निर्मला कुर्मीको न्यायको माग गर्दै माइतीघरमा ४१ दिनदेखि धर्ना

काठमाडौँ - नेपालगञ्जकी निर्मला कुर्मीको न्यायका लागि माइतीघर मण्डलामा विगत ४१ दिनदेखि धर्ना जारी छ । 

महिला अधिकार मञ्च बाँकेको अगुवाइमा माइतीघर मण्डलामा अधिकारकर्मी रुबी खानलगायतसहित पीडितका आफन्त धर्नासहित रिले अनशनमा बसेका हुन् ।

पीडितले न्याय नपाएसम्म अनिश्चितकालीन धर्नामा बस्ने उनीहरूले बताएका छन् । उनीहरूले निर्मला र नकुन्नी धोबी हत्या प्रकरण छानबिन समितिले पेस गरेको प्रतिवेदन सार्वजनिक गर्न तथा निर्मला कुर्मीको घटनामा सुरुदेखि अनुसन्धान गर्न माग गरेका छन् । 

यस्तै, बाँकेका एसपी श्यामकृष्ण अधिकारी र डिएसपी मधुसुदन न्यौपानेले अभियुक्तलाई संरक्षण गरेको भन्दै उनीहरूलाई अविलम्ब विभागीय कारबाही गर्न पनि पीडित पक्षले माग गरेका छन् । 

अधिकारकर्मी रुवी खानले यसअघि आफुहरुलाई सरकारले आश्वासन मात्र दिएको र निष्पक्ष छानबिन नभएकाले धर्नामा बसेको जानकारी दिए । 

यसअघि धर्नामा गृह मन्त्रालयको टोली पुगेपनि अधिकारकर्मीको अवस्था बुझ्न मात्र गएको बताएको थियो । बेपत्ता पारिएकी निर्मलाको न्यायका माग गर्दै विगत लामो समयदेखि आन्दोलन भइरहेको छ ।