यस वर्षको पद्मश्री सम्मान भक्तराजलाई, साहित्य पुरस्कार दाहाललाई

काठमाडौँ - यस वर्षको पद्यश्री साधना सम्मान भजनशिरोमणि भक्तराज आचार्यलाई प्रदान गरिएको छ । यस्तै पद्यश्री साहित्य पुरस्कार केशव दाहाललाई प्रदान गरिएको छ । उनले लेखेको मोक्षभूमि उपन्यासका लागि साहित्य पुरस्कार प्रदान गरिएको हो । 

खेमलाल हरिकला लामिछाने समाज कल्याण प्रतिष्ठानले प्रतिष्ठानका अध्यक्ष जिवा लामिछानेले गायक संगीतकार तथा गीतकार भजन शिरोमणि भक्तराज आचार्यलाई साधना सम्मान र सिंजा खस साम्राज्यमा भएको दासप्रथाबारे लेखिएको उपन्यास मोक्षभूमिलाई पद्यश्री साहित्य सम्मान अर्पण गर्न पाउँदा खुशी लागेको बताए । 

साथै उनले आउँदो वर्षको लागि पद्यश्री साहित्य पुरस्कार छनोट गर्ने निर्णयक समितिको नाम सार्वजनिक गरेका छन् । उनका अनुसार साहित्यकार कुमारी लामा, नयनराज पाण्डे र समालोचक राम लोहनी रहेको छनोट समितिले सम्मान र पुरस्कार पाउने व्यक्तिको नाम छनौट गर्नेछ । साथै अध्यक्ष लामिछानेले आगामी वर्षदेखि संस्थाले समाजसेवामा विशिष्ट योगदान पुर्‍याएका एक व्यक्तिलाई पद्यश्री सेवा सम्मान प्रदान गरिने पनि बताए ।

२०६२ सालमा  पद्यश्री साधना सम्मान र पुरस्‍कार स्‍थापना गरिएकाे  थियाे ।