बलात्कारपछि हत्या गरेको आरोपमा अभियुक्तलाई थुनामा

मकवानपुर- हेटौंडामा २० वर्षअघि बलात्कारपछि हत्या गरेको आरोपमा एक जना अभियुक्तलाई थुनामा पठाइएको छ । 

५ वर्षीया बालिकालाई ललाईफकाई बलात्कार गरी हत्या गरेर फरार रहेको ४५ वर्षीय सोमबहादुर राईलाई पक्राउपछि अदालतको आदेशले पुर्पक्षका लागि थुनामा पठाइएको हो । 

मकवानपुर जिल्ला अदालतका न्यायाधीश ऋषिराम निरौलाको इजलासले बुधबार राईलाई पुर्पक्षका लागि थुनामा राख्ने आदेश दिएको हो । राईले २०६० असोज १८ मा ‘चकलेट दिन्छु’ भनेर ५ वर्षीया बालिकालाई फकाएर बलात्कार पछि हत्या गरेर हेटौंडा–१० स्थित राप्ती खोलाको बगरमा ढुंगाको चेपमा शव फ्याकेर फरार भएको मकवानपुर प्रहरीको अनुसन्धानमा खुलेको थियो । 

जिल्ला प्रहरीको कार्यालयको अनुसन्धानमा राईले बालिकाको बलात्कार गरि हत्या गरेको प्रतिवेदन अदालतलाई बुझाएको थियो । २० वर्षदेखि फरार रहेका उनलाई जिल्ला प्रहरी कार्यालय मकवानपुर र वागमती प्रदेश प्रहरीको संयुक्त टोलिले गत साउन १३ गते ललितपुरको गोदावारी नगरपालिका –१४ ठैबबाट पक्राउ गरेको थियो । उनले प्रकाउ पछि प्रहरी समक्ष बालिकाको बलात्कार गरि हत्या गरेको बयान दिएका थिए ।