प्रदेश सरकारको बोर्ड फेर्ने मन्त्रिपरिषद्को निर्णय

पोखरा - गण्डकी प्रदेश सरकारले कार्यालयका बोर्ड तथा लेटरप्याड लगायत कागजात साथै छापमा प्रयोग हुने नाम फेर्ने निर्णय गरेको छ । मंगलबार साँझ ६ बजे बसेको मन्त्रिपरिषद बैठकले उक्त निर्णय गरेको हो । 

हाल मन्त्रालय तथा कार्यालयको बोर्ड तथा लेटरप्याडको सुरुमा प्रदेश सरकार मात्र उल्लेख रहेकामा अबदेखि गण्डकी प्रदेश सरकार राख्ने निर्णय भएको हो । यो निर्णयसँगै प्रदेश सरकार, मुख्यमन्त्री तथा मन्त्रिपरिषदको कार्यालय, गण्डकी प्रदेश, पोखराको स्थानमा अब गण्डकी प्रदेश सरकार मुख्यमन्त्री तथा मन्त्रिपरिषदको कार्यालय, पोखरा लेखिन्छ । गण्डकी प्रदेश सरकारका मन्त्रालय र मातहतका कार्यालयमा प्रयोग भएका बोर्ड र कागजात फेर्नुपर्ने भएको छ । 

योसँगै प्रदेशको स्वास्थ्य सचिवमा डा. विनोदविन्दु शर्मालाई नियुक्त गर्ने निर्णय भएको मन्त्रिपरिषद् स्रोतले जनाएको छ । सरकारले बिना विभागीय मन्त्री सीता सुन्दासलाई प्रवक्ता तोके पनि मिडिया ब्रिफिङ भने गरेकी छैनन् ।