प्रमुख समूहगत परिसूचक ओरालो लाग्दा पनि १० अंकले मात्र घट्यो नेप्से

काठमाडौँ– प्रमुख समूहगत परिसूचक ओरालो लाग्दा आइतबार नेपाल स्टक एक्सचेन्ज (नेप्से) परिसूचक १०.८३ अंकले घटेर २९२०.५१ बिन्दूमा कारोबार बन्द भएको छ । ‘क’ वर्गका कम्पनीहरूको सेयर मूल्य मापन गर्ने सेन्सेटीभ इन्डेक्स ०.०१ प्रतिशत अर्थात् ०.०६ अंकले बढेको छ । शुरुदेखि नै कारोबारमा उतारचढाव देखिएको नेप्से पौने २ देखि २ बजेर ४० मिनेटसम्म ओरालो लागेको थियो । 

आइतबार बैंकिङ, ट्रेडिङ, होटल तथा पर्यटन, विकास बैंक, जलविद्युत् र वित्त कम्पनी लगायतका समूहगत परिसूचकहरू ऋणात्मक देखिएको छ । त्यस्तै लघुवित्त र इन्भेस्टमेन्ट समूहका समूहगत परिसूचक पनि ऋणात्मक देखिएको छ । 

---

नेप्सेमा आइतबार कारोबार भएकामध्ये १३८ कम्पनीका सेयरधनीको सम्पत्ति घटेको छ भने ४६ कम्पनीका सेयरधनीको सेयर मूल्य बढेको छ । विन नेपाल लघुवित्त वित्तीय संस्थाको सेयर कारोबारमा सर्किट ब्रेकर लागेको छ । त्यस्तै, बुद्धभूमि नेपाल हाइड्रोपावर, मैलुङ खोला हाइड्रोपावर, ग्लोबल आइएमई र ज्योति लाइफ इन्स्यारेन्सका लगानीकर्ता बढी कमाउनेमा परेका छन् । 

त्यस्तै, सामलिङ पावर कम्पनी, गुँरास फाइनान्स, बेस्ट फाइनान्स, प्रभु बैंक तथा सांग्रिला डेभलपमेन्ट बैंकको ऋणपत्रका लगानीकर्ताले आज धेरै गुमाएका छन् । 
आज नेपाल टेलिकमको ३२ करोड १४ लाख मूल्यको २ लाख १३ हजार चार सय ३० कित्ता सेयर किनबेच भएको छ । अपि पावर, एनआइसी एसिया, शिखर इन्स्योरेन्स, ग्लोबल आइएमई बैंकको सेयर धेरै कारोबार हुने वर्गमा परेको छ । 

आइतबार दुई सय ३२ कम्पनीको ७ अर्ब ३ करोड ५ लाख रुपैयाँ मूल्यका १ करोड ४७ लाख चार हजार दुई ७७ कित्ता सेयर ८७ हजार चार सय ७८ पटकको कारोबारबाट खरिद–बिक्री भएको छ ।