दोहोरो अंकले घट्यो सेयर बजार परिसूचक

काठमाडौँ - नेपाल स्टक एक्सचेञ्ज (नेप्से) मंगलवारको कारोबारमा दोहोरो अंकले घटेको छ। साताको तेस्रो कारोबारमा बजार परिसूचक ११.८२ अंक घटेको हो । साताको पहिलो कारोबारमा ९५ अंकले बढेको बजार सोमबार २४ र आजको कारोबारमा १२ अंकले घटेको हो ।

बजार १२ अंक अर्थात ०.६१ प्रतिशतले घट्दा ‘क’ वर्गका कम्पनीहरूको मापक परिसूचक (सेन्सेटिभ इन्डेक्स) ३.२२ अंक अर्थात ०.८६ प्रतिशतले घटेर ३७२.६० अंकमा ओर्लिएको छ।

---

मंगलवार कारोबार रकम पनि उल्लेख्य रूपमा घटेको छ।  आइतवार र सोमवार २ अर्ब भन्दा माथिको कारोबार भएकोमा आज १ अर्बमा खुम्चिएको छ।

२३० कम्पनीहरूको कारोबारमा १ अर्ब ५ करोड ८२ लाख ४६ हजार ४ सय ७२ रूपैयाँ बराबरको सेयर कारोबार भएको छ। ३० लाख ३७ हजार ६ सय ३० कित्ता सेयर २३ हजार १ सय ३२ पटकमा खरिद बिक्री भएको छ ।

उप- समूह तर्फ मंगलवार बैंकिङ र जीवन बीमा समूह सामान्य अंकले बढेको छ भने बाँकी ११ समूहको सेयर मूल्य घटेको छ ।