प्रदेशसभाको गतिरोध हटाउन दलहरू छलफलमा

सुर्खेत- आगामी आर्थिक वर्षको बजेटका विषयमा नेकपा एमालेले कर्णाली प्रदेश सभाको बजेट अधिवेशनमा अवरोध गर्न थालेपछि दलहरू गतिरोध हटाउन प्रयासमा जुटेका छन् ।

लगातार तीन वटा बैठक अवरुद्ध भएपछि यसको निकासाको लागि सर्वदलीय बैठक बस्दैछ । ‘हामी छलफलको लागि बैठकमा सहभागी भएका छौ’ प्रदेशसभा सांसद एवं एमाले कर्णाली प्रदेश सभा दलका प्रमुख सचेतक गुलाबजंग शाहले भने, ‘बैठकपछि केही निस्कर्ष निस्केला ।’

---

प्रमुख प्रतिपक्षी दल एमालेले बजेटसम्बन्धी गत वर्ष भएको सर्वदलीय सहमति कार्यान्वयन नगरेको भन्दै आइतबारदेखि सदन अवरूद्ध गर्दै आएको छ । अहिले चलिरहेको सदन कर्णाली प्रदेश सरकारले ल्याएको आर्थिक वर्ष ०७९/८० को बजेटमाथिको छलफलमा केन्द्रित छ । बजेट प्रस्तुत भएयता केही बैठकमा छलफल चले पनि आइतबार आर्थिक मामिला तथा योजना मन्त्री विन्दमान विष्टले जवाफ दिएपछि चित्त नबुझेको भन्दै एमालेले सदन अवरूद्ध गरेको हो । 
अघिल्लो वर्ष अध्यादेशमार्फत ल्याइएको बजेटमा दिइएका सुझाव र बजेट कार्यान्वयनका सन्दर्भमा प्रमुख प्रतिपक्षी दलसँग भएको सहमति कार्यान्वयनमा सरकार र

सत्तापक्ष दलहरूले बेवास्ता गरेको प्रतिपक्ष दलको आरोप छ । गत वर्ष पनि एमालेले बारम्बार सदन अवरूद्ध गर्दै आएको थियो । 
अन्ततः २०७८ माघ १८ गते प्रमुख प्रतिपक्षी दलसहित बसेको सर्वदलीय बैठकले उनीहरूको माग सम्बोधन गर्दै विभिन्न विषयमा ७ बुँदे सहमति गरेको थियो। तीमध्ये आर्थिक वर्ष ०७८/७९ को बजेटमा उल्लेख भएका १५ लाख मुनिका टुक्रे योजना कार्यान्वन नगर्ने र आगामी बजेटमा पनि यस्ता योजना तर्जुमा नगर्ने सहमति पहिलो बुँदामा थियो ।

आर्थिक वर्ष ०७९/८० को बजेटमा पनि प्रमुख प्रतिपक्षी एमालेले यही विषयलाई लिएर लगातार रूपमा सदन अवरूद्ध गरेको छ ।