एकीकृत समाजवादी केन्द्रीय परिषद् बैठक : गठबन्धनबाट भएका कमजोरीलाई सच्याउँदै अघि बढ्ने

काठमाडौँ- नेकपा (एकीकृत समाजवादी) केन्द्रीय परिषद् बैठक सम्पूर्ण शक्ति प्रतिनिधि सभा र प्रदेश सभामा लगाउने निर्णय गर्दै सम्पन्न भएको छ । 

मंगलबार काठमाडौंमा सम्पन्न बैठकले अवको दुई महिना पार्टीलाई सवै स्थानमा सशक्त बनाउँदै सम्पूर्ण शक्ति प्रतिनिधि सभा र प्रदेश सभामा लगाउने निर्णय गरेको हो । बैठकले गठबन्धन भएमा गठबन्धन र नभए एक्लै निर्वाचनको तयारी गर्ने निर्णय गरेको प्रवक्ता जगन्नाथ खतिवडाले जानकारी दिए । स्थानीय तहमा गठबन्धनका तर्फबाट भएका कमी कमजोरीलाई सच्याउँदै अघि बढ्नुपर्नेमा पार्टीको जोड रहेको उनको भनाइ छ ।

---

उनले सवै बामपन्थीहरूलाई एकताका लागि पनि आह्वान गरेको प्रवक्ता खतिवडाले बताए । बैठकले दैनिक उपभोग्य वस्तुको मूल्य अत्याधिक रूपमा वृद्धि भएको भन्दै दैनिक उपभोग्य वस्तुहरूको मूल्य नियन्त्रण गरी सुपथ मूल्यमा आपूर्ति गर्ने व्यवस्था मिलाउन र मल तथा बिउ बिजन आपूर्तिको व्यवस्था गर्न माग गरेको छ । त्यस्तै राज्यका सबै अंगमा भ्रष्टाचार कमिसनतन्त्र र विचौलियाको दबदबा मौलाएको भन्दै राज्यका सबै अंग र तहहरूमा भ्रष्टाचारको छानबिन गर्न र भ्रष्टाचारीहरूमाथि कारबाही गर्न माग गरिएको प्रवक्ता खतिवडाले जानकारी दिए ।

बैठकले सुकुम्बासी समस्या, नागरिकता वितरणमा देखिएका समस्या समाधान र झाडापखला रोकथामका लागि जनचेतना फैलाउन निरोधात्मक कार्य गर्न तथा विरामीहरूको उपचारको उचित व्यवस्था गर्न सरकारसंग माग गरेको छ । बैठकले सरकारले सत्ता गठबन्धनको निर्णय अनुरूप स्टेट पार्टनरसीप प्रोग्राम (एसपीपी) मा नेपाल संलग्‍न नहुने निर्णयसहितको पत्र संयुक्त राज्य अमेरिकालाई पठाएकोप्रति धन्यवाद व्यक्त गरेको छ भने कम्युनिष्ट आन्दोलनको रक्षा र समाजवादी क्रान्तिको लक्ष्यतर्फ अगाडि बढ्नका लागि एकतावद्ध हुन र एकीकृत पार्टी निर्माणको दिशामा अघि बढ्न अपिल गरेको छ । 

बैठकले स्थानीय तह निर्वाचनको समिक्षा, पाँच दलीय वाम तथा लोकतान्त्रिक गठबन्धनको आवश्यकताका सन्दर्भमा गहन छलफल गर्दै संगठन निर्माण विशेष कार्ययोजना र आगामी संघीय तथा प्रदेश सभा निर्वाचनको तयारी योजनाहरू पारित गरेको प्रवक्ता खतिवडाले जानकारी दिए ।